Përkeqësohet punësimi për të rinjtë, u regjistruan të papunë 4.3 për qind më shumë në një vit
Papunësia po rritet te grupmosha 15-29 vjeç, ndërsa numri i të rinjve të punësuar ra me 4% në një vit.
Treguesit zyrtarë sinjalizojnë përkeqësim të mundësive për punësim te të rinjtë. Të dhënat e Anketës së Forcave të Punës tregojnë se numri i të papunëve në grupmoshën 15-29 vjeç u rrit me 16% në terma vjetorë në tremujorin e dytë të vitit 2026. Në të njëjtën kohë, të dhënat administrative tregojnë se 16,537 të rinj ishin të regjistruar si të papunë në zyrat e punësimit, me një rritje prej 4.3% krahasuar me një vit më parë.
Pas një përmirësimi të përkohshëm në tremujorin e parë të vitit 2025, papunësia e regjistruar te të rinjtë ka ndjekur një trajektore rritëse. Në tremujorët pasues, numri është rritur gradualisht, duke arritur në mbi 16.5 mijë persona në tremujorin e dytë të vitit 2026.
36.7 mijë të rinj rezultojnë të papunë
Të dhënat e Anketës së Forcave të Punës tregojnë se në tremujorin e dytë të vitit 2026 kishte 36.7 mijë të papunë të moshës 15-29 vjeç, nga 31.6 mijë në të njëjtën periudhë të vitit 2025. Ndërkohë, të dhënat administrative tregojnë se rreth gjysma e tyre janë regjistruar si të papunë në zyrat e punësimit.
Rritja e papunësisë së regjistruar te të rinjtë lidhet pjesërisht me vështirësitë e kësaj grupmoshe për t’u integruar në tregun e punës. Edhe pse ekonomia ka krijuar vende të reja pune, një pjesë e tyre janë përqendruar në sektorë ku kërkohen punonjës me përvojë ose aftësi specifike, ndërsa shumë të rinj përballen me mungesën e përvojës profesionale dhe të kualifikimeve të përshtatura me kërkesat e bizneseve.
Tranzicioni nga arsimi drejt punësimit mbetet i vështirë
Vitet e fundit, një numër i konsiderueshëm të rinjsh kanë zgjedhur të kërkojnë mundësi punësimi jashtë vendit, çka ka ulur ofertën e punës në disa sektorë, por njëkohësisht ka nxjerrë në pah vështirësitë e atyre që mbeten në tregun vendas për të gjetur punë të qëndrueshme.
Një pjesë e të rinjve kalojnë gjithashtu periudha më të gjata në kërkim të një vendi pune pas përfundimit të shkollimit. Kjo lidhet me tranzicionin më të vështirë nga arsimi drejt punësimit, veçanërisht për ata që nuk kanë përvojë të mëparshme profesionale.
Bien të rinjtë e punësuar, rritet punësimi i pensionistëve
Përkeqësimi i tregut të punës për të rinjtë po ndodh në një periudhë kur bizneset e konsiderojnë mungesën e fuqisë punëtore si një nga pengesat kryesore për aktivitetin e tyre. Në të njëjtën kohë, grupmoshat më të mëdha po integrohen më shpejt në tregun e punës, përfshirë edhe pensionistët.
Në tremujorin e dytë të vitit 2026, rreth 145 mijë pensionistë ishin duke punuar, me një rritje vjetore prej 10.4%. Ata përbënin 13% të numrit të përgjithshëm të personave të punësuar. Në të njëjtën periudhë, numri i të rinjve të punësuar ra në 170.3 mijë persona, ose 4% më pak krahasuar me një vit më parë.
k.jpg)